გამარჯობა

ეს არის წიგნის მაღაზია “ლატერნას” ბლოგი. აქ თქვენ გაეცნობით ლიტერატურასთან დაკავშირებულ სიახლეებს: მწერლებზე, გამომცემლობებზე, წიგნებზე… მოკლედ, ყველაფერს იმ ჯადოსნურ სამყაროზე, რასაც წიგნების სამფლობელო ჰქვია.

კეთილი იყოს თქვენი მობრძანება ჩვენს ბლოგზე!

Posted in ზოგადი | Tagged , , | დატოვე კომენტარი

“ჰარი პოტერი და დაწყევლილი ბავშვი”

nest-main-tablet

რამოდენიმე  წლის წინ, როდესაც „ჰარი პოტერის“ კითხვა დავიწყე და სხვების მსგავსად ეს ისტორები  ჩემთვისაც გასაოცარი რამ აღმოჩნდა, ნაკლებად თუ წარმოვიდგენდი, რომ ერთ დღესაც ხელში ავიღებდი წიგნს, რომელშიც  ჰარი პოტერის შვილის თავგადასავალი იქნებოდა მოთხრობილი. თუმცა, დღეს ასე მოხდა და  გავიცანი ბიჭი, სახელად ალბუსი (და არა ბიჭი, რომელიც ცოცხალი გადარჩა), რომლის დამოკიდებულებამაც, მამამისის მიმართ, თავდაპირველად, შეიძლება გაგაოცოთ კიდეც. ყველასათვის გასაოცარი და სახელოვანი ჰარი, თავისი შვილისათვის თითქმის არაფერს წარმოადგენს. რაც სრულიად დაშასვებია. „გმირის“ შვილებს საკუთარი თავგადასავლები და ისტორიები სჭირდებათ. ალბუსიც, სწორედ ამას ცდილობს.

იმ შემთხვევაშიც კი როდესაც სხვა პერსონაჟების თავგადასავალს კითხულობ, კონკრეტულად კი ჰარი პოტერისა და დრაკო მალფოის შვილების, მათში მაინც შენთვის საყვარელი და ნაცნობი გმირების პოვნას ცდილობ. რა თქმა უნდა, ეს გმირები პიესაში ძალიან ხშირად გვხვდებიან, თუმცა ახლა უკვე: გაზრდილები, შეცვლილები, სხვა პასუხისმგებლობებითა და განსხვავებული ამბებით. მოკლედ, ეს ის არ არის, რაც ადრე იყო. თუმცა, ცხადია ყველა გმირი ისევ საყვარელი და ახლობელია.

„დაწყევლილი ბავშვი“ შეიძლება ითქვას, მკითხველისთვის  საჩუქარიც კია, რომლის მეშვეობითაც ვიგებთ, თუ როგორები არიან ჩვენთვის ნაცნობი პერსონაჟები წლების შემდეგ. თუმცა განსხვავება ის არის  რომ, თუ ადრე ყველა პერსონაჟი შენს გვერდით გეგულებოდა და  ნათლად ხედავდი მათ, ახლა მხოლოდ შორიდან უცქერ და გიჭირს კარგად წარმოიდგინო, როგორები არიან ისინი.

ალბათ, მათ შორის ვინც “დაწყევლილი ბავშვი” წაიკითხა, რამოდენიმე მაინც ფიქრობს, რომ სჯობდა საერთოდ არ წამეკითხაო და ამის  მიზეზიც აქვთ:

ეს ახალი ისტორია პიესის სახითაა; ყველაფერი ძალიან სწრაფად ხდება; ამბავიც ისეთი გადასარევი არი არის, როგორ ამბებსაც ვართ მიჩვეული; მთავარი გმირებიც ჩვენთვის უცხოები არიან და ა.შ, მაგრამ იმ შემთხვევაში თუ „დაწყევლილ ბავშვს“ წაიკითხავთ, აუცილებლად გაგიჩნდებათ სურვილი კიდევ ერთხელ და უამრავჯერ გადაიკითხოთ „ჰარი პოტერის“ ყველა ნაწილი და ბოლოს, თუ „აზკაბანის ტყვეში“ დროის მდევარმა გაგაოცათ და მისი ხანმოკლე არსებობით დანაკლისი იგრძენით, „დაწყევლილი ბავშვი“ ამ დანაკლისს აუცილებლად აგინაზღაურებთ.

 

ავტორი: სოფო ბანძელაძე

Posted in ზოგადი | დატოვე კომენტარი

ასტრიდ ლინდგრენი – “ძმები ლომგულები”

7475976

არავინ ვიცით რა ხდება სიკვდილის შემდეგ. ეს არც ლინდგრენმა იცოდა, სწორედ ამიტომ მან  შექმნა პარალელური სამყარო, რომელსაც  „ნანგიალა“ ჰქვია. ამ ჯადოსნურ სამყაროში კი ძმები ლომგულები ცხოვრობენ. ეს არის ადგილი, სადაც ყველაფერი კარგადაა, უფრო სწორად, თითქმის ყველაფერი… “ნანგიალაში” კი  „ალუბლების მხარეა“, რომელიც წესით და რიგით,  ზღაპრული უნდა იყოს და მართლაც ასეა. ავტორი ისე აღწერს „ალუბლების მხარეს“, რომ კითხვისას ზაფხულის გრილი საღამოს  სიოსაც გრძნობ და ყვავილების სასიამოვნო სურნელსაც. მდინარეში, სკორპასთან და ჯონათანთან  ერთადაც ბანაობ; მათთან ერთად მიაჭენებ ცხენს და მათთან ერთად ხარ ბედნიერი, თუმცა ხანდახან „ნანგიალაშიც“ კი არ არის იდეალურად ყველაფერი. ამბიციური თენგილი, იმდენად შეპყრობილი ჰყავს ძალაუფლების მოპოვების დაუცხრომელ სურვილს, რომ მისი წყალობით, ასეთ ლამაზ და ზრაპრულ მხარესაც კი დიდი განსაცდელი ელის…

საბოლოოდ კი, როდესაც „ნანგიალაშიც“ კვდებიან, გარდაცვლილები ახალ, ზღაპრულ და ბევრად უკეთეს ადგილას გადაინცვლებენ, ამ ადგილს კი „ნანგილიმა“ ჰქვია. მართალია, ჩვენ უკვე აღარ ვიცით რა ხდება მაშინ, როდესაც „ნანგილიმაშიც“ მთავრდება სიცოცხლე ( მთავრდება თუ არა საერთოდ), თუმცა ლინდგრენი პესიმისტური განწყობით სულაც არ გვტოვებს, პირიქით, იგი ყოველ ჯერზე უკეთესზე უკეთეს სამყაროს და ცხოვრებას გვთავაზობს, სწორედ ისეთს როგორისკენაც უნდა მიისწრაფვოდეს ადამიანი.

„ოჰ, ნანგილიმა! ჯონათან, ვხედავ, ვხედავ სინათლეს! მე სინათლეს ვხედავ!“

ოსტატურად დაწერილი ეს ტექსტი, რომელიც თითქოს მხოლოდ საბავშვო-სათავგადასავლო ჟანრის ლიტერატურას მიეკუთვნება, ისეთ მნიშვნელოვან საკითხებზე ამახვილებს ყურადღებას, როგორიცაა: თავისუფლებისათვის ბრძოლა, თავგანწირვა, სიმამაცე, ერთგულება და ის დიდი სიყვარული, რომელიც ძმებ ლომგულებს აკავშირებთ ერთმანეთთან.

ავტორი: სოფო ბანძელაძე

Posted in ზოგადი | დატოვე კომენტარი

როალდ დალი – “მატილდა”

puffin-9780141349985-11

თუ ვინმეს ჰგონია, რომ „მატილდა“ მხოლოდ საბავშვო ნაწარმოებია, იმთავითვე სცდება. ეს წიგნი არ არის მხოლოდ ბავშვებისთვის. მეტიც, მასში წამოჭრილი პრობლემების შესახებ, შესაძლებელია, ბავშვებს სულაც არ ჰქონდეთ წარმოდგენა და ავტორისეულ ენას და იმას თუ რას გულისხმობს თავის ნამუშევარში იგი, ზრდასრული ადამიანი უკეთ მიხვდება, ვიდრე ბავშვი, თუ რა თქმა უნდა, ეს ბავშვი თავად მატილდა არ არის.

როალდ დალი, მართალია გაზვიადებით, მაგრამ თითქმის ზუსტად ასახავს იმ პირობებს, რა პირობებშიც, შეიძლება, უხდებოდეთ პატარებს სწავლა-განათლების მიღება. ავტორი  ამ ტექსტით, თითქოს ყველას მოუწოდებს მეტი ყურადღებისა და სიფრთხილისკენ. ამის მაგალითად კი მატილდას იყენებს. საქმე კი იმაშია, რომ მატილდა ძალიან ჭკვიანი და იშვიათი უნარების მქონე გოგონაა, რომლის ინტელექტუალური და ფიზიკური შესაძლებლობები ირგვლივ მყოფთათვის უმნიშვნელო და დაუჯერებელია, გარდა მისი მასწავლებლისა.

ხშირად, როგორც მის ჰანის შემთხვევაში, ბავშვებსა და მოზარდებს თავიანთ შესაძლებლობებსა და სიმამაცეს, უფროსები ადრეულ ასაკშივე უკლავენ და ისინი „არასწორად“ თავიანთი სურვილების შეუსაბამოდ ვითარდებიან. მატილდას კი სწორედ ისეთი მშობლები ჰყავს, რომლებიც „არავითარ ინტერესს არ იჩენენ თავიანთი შვილების მიმართ და თქმაც არ უნდა, გაცილებით უფრო უარესები არიან, ვიდრე შვილებზე დაფეთებული მშობლები (როალდ დალი-„მატილდა“).“

ასევე, როალდ დალის, ეს ტექსტი ერთგვარი მოწოდებაა, რომ ბავშვებმა და  მოზარდებმაც იკითხონ წიგნები. აქ ვხვდებით ისეთ ავტორებს, როგორებიც არიან: დიკენსი, ძმები გრიმები, ანდერსენი და სხვ.  ამასთან, ირონიულად, მიწასთან ასწორებს ტელევიზიას და იმ ხალხს, ვინც ამ „ყუთზეა“ დამოკიდებული.

მაშინაც კი, როდესაც მატილდა სრულდება, გგონია რომ ის ჯერ კიდევ არ დასრულებულა, რადგან თვლი, რომ ასეთი საინტერესო და მრავალფეროვანი პერსონაჟისათვის ის რაც უკვე წაიკითხე  საკმარისი არ არის, თუმცა რაც საჭირო იყო ის უკვე გაიგე, ახლა კი ჯერი შენს ფანტაზიაზეა…

 

ავტორი: სოფო ბანძელაძე

Posted in ზოგადი | დატოვე კომენტარი

ჰაინრიხ ბიოლი – “კლოუნის თვალთახედვა”

the-clown (1)„მურა ნახშირის მწარმოებელი შნირების შთამომავალი“ – ასე უწოდებს საკუთარ თავს ჰანსი.  იგი შეძლებულ, მაგრამ  ძუნწ მშობლებს ტოვებს და მათ მხოლოდ იმ უკიდურეს შემთხვევაში სთხოვს დახმარებას, როდესაც თავისი პროფესიით თავს ვეღარ ირჩენს.

ნაწარმოებში გვხვდებიან ფულზე, სახელზე, „კარგ ცხოვრებაზე“ ორიენტირებული ადამიანები, რომლებიც  მხოლოდ აგროვებენ, რადგან უზრუნველი მომავალი ჰქონდეთ, თუმცა მომავალი არ არსებობს, იგი მათ უკვე გამოეპარათ.  არსებობს მხოლოდ მუდმივი დაძაბულობა – ფულის შენახვა/დაგროვება, თუმცა  „არასოდეს ესმით, რომ ამა თუ იმ წუთში ის არის საჭმელი, ტაქსი, ერთი კოლოფი სიგარეტი, თუ აბაზანიანი ოთახი“ (ჰანსი).

„კლოუნს მელანქოლია ანადგურებს”. თითქმის ყველასაგან უყურადღებოდ დატოვებული ხელოვანი, შავი მელანქოლიით შეპყრობილი გადის გარეთ მარტის გრილ საღამოს: გიტარით, ბალიშით, ქუდით და სიგარეტის კოლოფით, რომელშიც უკანასკნელი ღერი გდია და იწყებს სიმღერას. ნაღვლიანი სიმღერის ფონზე კი, ქუდში პირველი მონეტა ვარდება …

ავტორი: სოფო ბანძელაძე

Posted in ზოგადი | დატოვე კომენტარი

ბოლო ასწლეულის ტრაგიკული წიგნების ხუთული…

heartache

ალბათ, წვიმიან და ცივ ამინდს ისე არაფერი შეეფერება, როგორც სევდიანი წიგნი.
წიგნი, რომლის წაკითხვის შემდეგ მიხვდებით, რომ ყველაფერი ისეთი მარტივი არ არის, როგორც ერთი შეხედვით ჩანს, რომელიც ცხოვრების ბნელ მხარეებს დაგანახებს და შესაძლოა, მადლიერებითაც კი აღგავსოს შენი ბედ-იღბალის მიმართ.
„ლატერნამ“ აარჩია  ბოლო ასწლეულის, ყველაზე ტრაგიკული წიგნები, რომელთა წაკითხვაც ქართულადაც შეგიძლიათ .

1. „თაგვებსა და ადამიანებზე“ – ჯონ სტეინბეკი

რომანი მოგითხრობთ ორი მუშის ჯორჯ მილტონისა და ლენი სმოლის ისტორიას, რომელთაც ერთი საერთო ოცნება აქვთ – ჰქონდეთ საკუთარი სახლი და დიდი ბოსტანი, მოაშენონ კურდღლები, იყოლიონ წიწილები და ზამთრის წვიმებში, ღუმელთან შემომსხდარნი, ყური მიუგდონ, როგორ ეცემა წვიმის წვეთები სახლის სახურავს. მაგრამ ყველა ოცნებას ახდენა არ უწერია.

ეს არის წიგნი მეგობრობაზე, სექსიზმზე, რასიზმზე და ყველა იმ პრობლემაზე, რომელსაც ამერიკა დიდი დეპრესიი პერიოდში აწყდებოდა. რომანის ბოლო, შემზარავი სცენა კი მიგახვედრებთ, რომ რეალობისა და ოცნების ჭიდილში, პირველის გამარჯვება უმეტესად ტრაგიკულ შედეგს იძლევა.

  1. „ყვავილები ელჯერნონისთვის – დენიელ კიზი

რომანი მოგვითხრობს ერთი სპეციალური საჭიროების მქონე მამაკაცის, ჩარლის შესახებ, რომელსაც ოპერაციას უკეთებენ, და შედეგად მისი IQ 180ს უტოლდება. წიგნი დღიურის სახითაა დაწერილი. მკითხველი თვალს ადევნებს ჩარლის ჩანაწერებს, აკვირდება მის ტრანსფორმაციას, მისი გრძნობებისა და დამოკიდებულებების ცვლას. მკითხველი ჩარლისთან ერთად ვითარდება, განიცდის მის სიხარულს, ტკივილს, მოლოდინსა და შიშს და გრძნობს, რომ იცოდე ყველაფერი არ ნიშნავს იყო ბედნიერი.,

  1. „საოცარი ახალი სამყარო“ – ოლდოს ჰაქსლი

XX საუკუნის ერთ-ერთი საუკეთესო ნაწარმოები.
წიგნში მოქმედება  მომავალში ხდება, სადაც მმართვლებმა შექმნეს იდეალური სამყარო. ბავშვობიდანვე ჩანერგილი იდეოლოგიით, თავისუფალი სექსუალური ცხოვრებისა და ნარკოტიკების გამო ადამიანბი ბედნიერნი არიან, მაგრამ არსებობს გამონაკლისი – ბერნარდი რომელიც თავს მარტოსულად გრძნობს და თავისუფლება სურს. ამიტომ, ის მიდის „ველურების“ სანახვად, რომელბიც ისევ ძველი წესების მიხედვით  ცხოვრობენ, რომელბსაც ჯერ კიდევ აქვთ წიგნები და რომელბიც ცოცხლადშობენ.

  1. „ხიდი ტერაბითიაში“ – ქეთრინ პატერსონი

ხიდი ტერაბითიაში- ჯესი და ლესლი ჩვეულებრივი მოზარდები არიან, თავიანთი პრობლემებით ბავშვებთან, მშობლებთან, მასწავლებლებთან … მაგრამ ისინი გამოიგონებენ საკუთარ ქვეყანას, ტერაბითიას, სადაც ყველაფერი შესაძლებელია, სადაც ისინი მეფე და დედოფალი არიან და სადაც ყველა კეთილშობილი და შემწყნარებელია.

  1. „ცხოვრება წინაა“ – რომენ გარი

შესაძლოა დანარჩენი წიგნებისგან განხსვავებით, რომენ გარის ეს შესანიშნავი რომანი ტრაგიკულად არ მთავრდება, მაგრამ  ნარაწრმოების მთავარი გმირი, პატარა ბიჭუნას თავგადასავალი ნამდვილად მოგგვრით ცრემლებს.

“ცხოვრება წინაა” არაბი მოზარდისა და მისი ებრაელი აღმზრდელის გულისშემძვრელი ამბავია. უკიდურეს გაჭირვებაში მცხოვრებ სხვადასხვა ეროვნებისა და სარწმუნოების ადამიანებს ერთი რამ აძლევს ძალას, რომ წინ, მომავლისკენ იმედით მიაპყრონ მზერა- ესაა სიყვარული, მოყვასის სიყვარული, რომელსაც ვერაფერი აკნინებს- ვერც სიღატაკე, ვერც ჭუჭყი, ვერც გაუნათლებლობა, ვერც სამარცხვინო ხელობა.

Posted in ზოგადი | %(count)s კომენტარი

შობის ბაბუას წერილები – ჯ. რ. რ. ტოლკინი

 

“შობის ბაბუას წერილები” – ტოლკინის ხელნაწერებისგან შემდგარი წიგნია. საშობად, მწერალი შვილებს უგზავნიდა წერილებს შობის ბაბუის სახელით, სადაც მოუთხრობდა სახალისო ისტორიებს ჩრდილოეთ პოლუსიდან. წერილების მთავარი გმირები იყვნენ: შობის ბაბუა, თეთრი დათვი, მისი ძმისშვილები პაკსუ და ვალკოტუკა, გობლინები, წითური გნომები და სხვები. 


” ვიმედოვნებ, მოგწონს ის საჩუქრები,რომლებსაც გიგზავნი. ამჟამად, როგორც ჩანს,დაინტერესებული ხარ მატარებლებით და მეც ვცდილობ ყველაფერი მასთან დაკავშირებული მოგართვა. საჩუქრებთან ერთად,ასევე, გიგზავნი  უდიდეს სიყვარულს. იცოდე, მე და მოხუცი პოლარული დათვი სიამოვნებით ვკითხულობთ შენი და შენი ცხოველების წერილებს და თუ გგონია,რომელიმე შენი წერილი არ წაგვიკითხავს,  რადგან ის, რაც გინდოდა ვერ მიიღე და შესაძლოა, ვერც უწინდებურად ბევრი საჩუქარი მოგიტანე, ძალიან შემცდარხარ. უბრალოდ, გახსოვდეს შობას, მსოფლიოს გარშემო, უამრავი ღარიბი და მშიერი ადამიანი ხვდება. მე და ჩემმა მწვანე მეგობრებმა კი შევაგროვეთ საჭმელი, ტანსაცმელი, სათამაშოები იმ ბავშვებისთვის, რომლებსაც ვერც დედ-მამა და ვერც მეგობრები ვერ აძლევენ საჩუქრებს, საჭმელსაც კი. ვიცი, რომ შენ ამას არ დაივიწყებ. ასე, რომ ჩემო ძვირფასო, ვიმედოვნებ იქნები ბედნიერი ამ შობას, არ იჩხუბებ, გაერთობი შენი მატარებლით და არ დაივიწყებ მოხუც შობის ბაბუას, როდესაც ნაძვისხეს გაანათებ.”

  1. შობის სახლი
    ჩრდილოეთ პოლუსი
    1920 წლის 22 დეკემბერი.ძვირფასო ჯონ.
    როგორც გავიგე მამაშენისთვის გიკითხავს როგორ გამოვიყურები და სად ვცხოვრობ. ამიტომ შენთვის დავხატე ჩემი თავი და სახლი. გაუფრთხილდი ამ სურათს. ახლახან ოქსფორდიდან ჩამოვედი და თან სათამაშოების ხურჯინი ჩამოვიტანე, ზოგიერთი მათგანი შენთვისაა.. იმედია, დროზე ჩამოსავლას მოვახერხებ. ჩრდილოეთ პოლუსზე დიდი თოვლია.სიყვარულით შობის ბაბუა.

    tolkien-father-christmas-letters-003

 

2.

ჩრდილოეთ პოსული

შობის წინა დღე, 1923 წელი

ჩემო ძვირფასო ჯონ.

დღეს ძალიან ცივა და ხელები მიკანკალებს – ათას ცხრაას ოცდაოთხი, არა! ოცდაშვიდი! წლის ვარ ამ შობას – გაცილებით მოხუცი ვიდრე შენი დიდი ბაბუა, ამიტომ ვეღარ ვიჩერებ ამ კალამს. მაგრამ როგორც გავიგე, შენ უფრო და უფრო კარგად კითხულობ და მეც მჯერა,რომ ჩემს წერილს წაიკითხავ.

გიგზავნი დიდ სიყვარულს (მაიკლსაც) და ლოტის აგურებს. ვფიქრობ ეს უფრო ლამაზი და ძლიერია, ვიდრე Picabrix-ი. ვიმედოვნებ, მოგეწონება.

ახლა კი უნდა წავიდე. ლამაზი, მშვენიერი ღამეა და მეც დილამდე, ასობით მილი მაქვს გასავლელი  – ძალიან ბევრი საქმეა გასაკეთებელი.

ცივი კოცნა.

შობის ბაბუა.

stamp

3.

სახლი კლდეზე

სამყაროს მწვერვალი

ჩდილოეთ პოლუსთან ახლოს

შობა – 1925 წელი.

ჩემო ძვირფასო ბიჭებო,

საშინლად დაკავებული ვარ ამ წელს და არც ისე მდიდარი – რაც უფრო მეტს ვუფიქრდები ამ საკითის მით უფრო მაგრად მიკანკალებს ხელები. აქვე, აღსანიშნავია, რომ საშინელი ინციდენტი მოხდა და საჩუქრების ნაწილი გაფუჭდა. არც ჩრდილოელი დათვია ჩემს გვერდით, რომ დამეხმაროს. სახლის გადატანაც  მარტოს მომიხდა, ზუსტად შობის წინა დღეს. წარმოიდგინეთ რა მდგომარეობაშია ყველაფერი და მიხვდებით თუ რატომ გიგზავნით წერილს სხვა მისამართიდან და რატომ გწერთ ორივეს ერთად.

ყველაფერი კი ასე მოხდა: ნოემრბის მიწურულს, ერთ ქარიან დღეს, ჩემი ქუდი გაფრინდა და ჩრდილოეთ პოლუსის კენწეროში გაიჭედა. მიუხედავად იმისა, რომ ვეუბნებოდი არ გაეკეთებინა, ჩრდილოელი პოლარული დათვი მაინც აცოცდა მაღლა მის ჩამოსატანად – და ჩამოიტანა კიდეც. პოლუსი შუაზე გაიპო და ჩემი სახლის სახურავს დაეცა, პოლარული დათვი კი,რომელსაც ჩემი ქუდი ცხვირზე ჰქონდა ჩამოფარებული, ჩემს სასადილო ოთახში ჩამოვარდა, თან სახურავის თოვლიც ჩამოიყოლა. თოვლი დადნა, ჩააქრო ბუხარში ცეცხლი და სარდაფეფშიც წყალი ჩავიდა,იქ სადაც მე ამ წლის საშობაო საჩუქრებს ვინახავდი. ამავედროს, ჩრდილო პოლარულმა დათვმა ფეხი მოიტეხა.

ახლა ის კარგადაა, მაგრამ როგორც განახდა აღარ დამეხმარება. -ვიმედოვნებ, მომავალი შობისთვის მოლბება და  მისი გუნება-განწყობილებაც შეიცვლება.

გიგზავნი ინციდენტის სურათს და ასევე, ჩემი ახალი სახლისა, რომელიც ჩრდილო პოლუსის კლდის წვერზეა. თუ ჯონს, ჩემი ნაწერის წაკითვა გაუჭირდება(მე ხომ ათას ცხრაას ოცდახუთი წლის ვარ) მამამის დაუძახოს.  მაიკლი როდის ისწავლის კითვას და როდის დამიწერს წერილებს? დიდ სიყვარულს გიგზავნით ორივეს და ასევე კრისტოფერსაც, რომლის სახელიც უფრო მიესადაგება ჩემსას.

სულ ესაა, ნახვამდის:

შობის ბაბუა.

Posted in ზოგადი | %(count)s კომენტარი

Top – 10; თანამედროვე მწერლების ფავორიტი წიგნები

o-BOOKS-facebook

ჯენიფერ იგანმა (ამერიკელი მწერალი) თქვა: „კითხვა საზრდოა, რომელიც საინტერესო სამუშაოს შესრულებაში გეხმარება.“

კითხვა და წერა, ეს ის თანაკვეთაა, რომელიც საკულტო ავტორების უდიდეს საიდუმლოს წარმოადგენს. არ ვიცით, როგორ იყო  და რომელ წიგნებს დაასახელებდნენ წლების წინ, მაგრამ ამჟამად, თანამედროვეობის ცნობილმა ამერიკელმა და ინგლისელმა ავტორებმა თავიანთი ფავორიტები გაგვაცნეს. სულ გამოიკითხა 125 მწერალი.  დასახელდა 544 წიგნი. თითოეული სიაში განაწილდა მინიჭებული ქულების მიხედვით.  სიის სათავეში მყოფ წიგნს მიენიჭა – 10 ქულა, საბოლოოდ კი – 1 ქულა.

მე20 საუკუნის წიგნების ათეული:

  1. „ლოლიტა“ – ვლადიმერ ნაბაკოვი.
  2. „დიდი გეტსბი“ – ფ. სკოტ ფიტჯერალდი
  3. „დაკარგული დროის ძიებაში“ – მარსელ პრუსტი
  4. „ულისე“ – ჯეიმს ჯოისი
  5. „დუბლინელები“ – ჯეიმს ჯოისი
  6. „მარტოობის ასი წელი“ – გაბრიელ გარსია მარკესი
  7. „გზა შუქურისკენ“ – ვირჯინია ვულფი
  8. მოთხრობები – ფლანერი ო’კონერი
  9. „ხმაური და მძვინვარება“ – უილიამ ფოლკნერი.
  10. „მკრთალი ცეცხლი“ – ვლადიმერ ნაბოკოვი

 

 მე19 საუკუნის წიგნების ათეული:

  1. „ანა კარენინა“ – ლევ ტოლსტოი
  2. „მადამ ბოვარი“ – გუსტავ ფლობერი.
  3. „ომი და მშვიდობა“ – ლევ ტოლსტოი
  4. „ჰაკლბერი ფინის თავგადასავალი“ – მარკ ტვენი
  5. მოთხრობებ – ანტონ ჩეხოვი
  6. “Middlemarch”- ჯორჯ ელიოტი
  7. „მობი დიკი“ – ჰერმან მელვილი
  8. „დიდი იმედები“ – ჩარლზ დიკენსი
  9. „დანაშაული და სასჯელი“ – ფიოდორ დოსტოევსკი
  10. „ემმა“ – ჯეინ ოსტინი

 

        ავტორების ათეული (არჩეული წიგნების მიხედვით)

  1. უილიამ შექსპირი – 11
  2. უილიამ ფოლკნერი – 6
  3. ჰენრი ჯეიმსი – 6
  4. ჯეინ ოსტინი – 5
  5. ჩარლზ დიკენსი – 5
  6. ფიოდორ დოსტოევსკი- 5
  7. ერნეტს ჰემინგუეი – 5
  8. ფრანც კაფკა – 5
  9. ჯეიმს ჯოისი; თომას მანი; ვლადიმერ ნაბაკოვი; მარკ ტვენი; ვირჯინია ვულფი – 4

 

ავტორების ათეული (ქულების მიხედვით)

  1. ლევ ტოლსტოი – 327
  2. უილიამ შექსიპირი – 293
  3. ჯეიმს ჯოისი – 194
  4. ვლადიმერ ნაბაკოვი – 190
  5. ფიოდორ დოსტოევსკი- 177
  6. უილიამ ფოლკნერი -173
  7. ჩარლზ დიკენსი – 168
  8. ანტონ ჩეხოვი – 165
  9. გუსტავ ფლობერი – 163
  10. ჯეინ ოსტინი – 161

 

Posted in ზოგადი | დატოვე კომენტარი

“ჰაკლბერი ფინის თავგადასავალი”-ს იშვიათი ილუსტრაციები.

როდესაც წიგნს ილუსტრაციები ახლავს თან, გმირების, ადგილების და სიტუაციების წარმოდგენა უფრო მარტივი ხდება და თქვენც ნაწარმოების ის პერსონაჟი ხდებით, რომელიც ფანტაზიით უკავშირდება იმ საყაროს, რომელიც ფურცელზეა გადმოცემული

მაგრამ, რაღაც ჯადოსნური, არაჩვეულებრივი ხდება, როდესაც საყვარელ წიგნს ახალი, შენთვის მისაღები ილუსტრაციებით ხედავ. მითუმეტეს, თუ ილუსტრაციები ისეთი შესანიშნავი მხატვრის მიერ არის შესრულებული, როგორც ნორმან როკველი იყო.
გთავაზობთ, როკველის იშვიათ ილუსტრაციებს, რომელიც შექმნა –  მარკ ტვენის – „ჰაკლბერ ფინის თავგადასავლისთვის“.

normanrockwell_huckfinn9

normanrockwell_huckfinn2

normanrockwell_huckfinn3

normanrockwell_huckfinn7

normanrockwell_huckfinn4

normanrockwell_huckfinn6

normanrockwell_huckfinn5

normanrockwell_huckfinn8

Posted in ზოგადი | დატოვე კომენტარი

16 რომანი, რომლებიც პირველივე ფრაზიდან გვაცვიფრებენ…

1404805419_596264-1920x1200-1024x640

  1. “ლოლიტა”

„ლოლიტა, ჩემი სიცოცხლის ნათელო, წელთა ჩემთა მხურვალებავ, ცოდვავ ჩემო, სულო ჩემო. ლოლიტა: ენის წვერი სასაზე სამი პაწაწინა ნაბიჯით გადაადგილდება, რათა მესამედ კბილებს შეეტაკოს. ლო.ლი.ტა.“

book-covers-bshk-20

  1. “ცემენტის ბაღი”

მამაჩემი მე არ მომიკლავს, მაგრამ ზოგჯერ მიფიქრია, იქნებ მეც შევუწყვე-მეთქი ხელი.

cement-garden-cover

  1. “ქართულის რვეულები”

ქართველ თავადებზე როცა ფიქრობ კაცი, უამრავი რამ გახსენდება.

ალბათ, გაგახსენდება ხმალი, სიათა თოფი ანდა ხირიმი, ქორი და კაპუეტი და მეფის ტახტი, რომლისთვისაც ხშირად თავი დაუდიათ და ხშირად არც დაუდიათ.

cms-image-000018749

  1. “ნაივური. სუპერი”

ორი მეგობარი მყავს, ერთი კარგი და ერთი ცუდი… და კიდევ, მყავს ძმა, რომელიც, შესაძლოა, ჩემსავით სიმპათიური ვერ არის, მაგრამ მასაც არა უშავს…

naiv

  1. “მდგმური”

მიზანი მაცთურია, ბატონებო. სანამ მიაღწევთ, თქვენი გგონიათ; როცა მიაღწევთ, მაშინღა მიხვდებით, რომ სხვისი ყოფილა.

Mdgmuri_Cover

  1. “ყვავილები ელჯერნონისთვის”

ექიმა სტრაუსმა ესე მითხრა დღეიდან ყველაფერი დაშერე რასაც ფიქროფ და გახსოვს და რაც გემართებაო. აზზე არ ვარ რატო მარა იმან თქვა ეგ ძაან მნიწნელოვანიაო რო გავიგოთ გამოდგები თუ არაო…

elgernon

  1. “ქაღალდის ქალაქები”

ჩემი დაკვირვებით, ერთი სასწაული ყველა ადამიანის ცხოვრებაში ხდება. როგორ აგიხსნათ… აი, მე, მაგალითად, შეიძლება მეხი არასოდეს დამეცეს, ნობელის პრემიის ლაურეატი ვერასოდეს გავხდე, ვერც წყნარი ოკეანის რომელიმე პატარა კუნძულოვანი სახელმწიფოს დიქტატორად ვიქცე, არც ყურის კიბომ მომიღოს ბოლო და არც თვითაალება დამემართოს, მაგრამ დიდი ალბათობაა, რომ მსგავსი რამ თითოეულ ჩვენგანს ოდესმე შეემთხვა…

paper towns

  1. “გაუჩინარებული ქალი”

ყოველ ჯერზე, როცა ჩემს ცოლზე ვფიქრობ, ჯერ მისი თავი მაგონდება, რომელსაც ისეთი ფორმა აქვს, უეჭველია, ამით უნდა დავიწყო. პირველად ის ზურგიდან დავინახე და მოვიხიბლე. რაღაც გულისამაჩუყებელი იყო თავის ამ მოყვანილობაში, რომელიც დამწიფებულ კაკალსა თუ რიყის ქვას მოგაგონებდათ. ვიქტორიანულ ეპოქაში ამაზე იტყოდნენ: იდეალური ფორმის თავი აქვსო. ამიტომ ასეთ თავის ქალას ადვილად წარმოიდგენთ.

gone-girl-book-cover-med

  1. “ტომ სოიერის თავგადასავალი”
  • ტომ!

პარუხი არ არის!

  • ტომ!

პარუხი არ არის!

  • რა დაემართა იმ ბიჭს, ტომ!

the_adventures_of_tom_sawyer

  1. “მარტოობის ასი წელიწადი”

გაივლის წლები და დახვრეტის მოლოდინში კედელთან მდგომი პოლკოვნიკი აურელიანო ბუენდია იმ შორეულ საღამოს გაიხსენებს, მამამისმა ყინულის სანახავად რომ წაიყვანა პირველად.

100

  1. “ჰობიტი”

მიწაში იყო სორო, რომელშიც ჰობიტი ცხოვრობდა. ეს სულაც არ იყო საშინელი, ჭუჭყიანი, ნესტიანი სორო, ყოველი მხრიდან გამოჩრილი ჭიაყელების კუდებით და მყრალი სუნით; არც გამომშრალი, ცარიელი და ქვიშიანი სორო იყო, სადაც ვერც სკამს ნახავ და ვერც საჭმელს – სორო ჰობიტს ეკუთვნოდა, რაც იმას ნიშნავს, რომ ის ყოველ მხრივ კეთილმოწყობილი გახლდათ.

hobbits

  1. “ანა კარენინა”

ყველა ბედნიერი ოჯახი ერთმანეთს ჰგავს, ყოველ უბედურ ოჯახს კი თავისი უბედურება სჭირს.

ყველაფერი აირია ობლონცკების სახლში…

anna-k

  1. “ბესტსელერი”

თითქმის არ მეგულება ადამიანი, წინასიტყვაობის კითხვა რომ უყვარდეს. წერა – მით უმეტეს. ალბათ, იმიტომ, რომ წინასიტყვაობათა უმეტესობა ისეთივე გრძელია ხოლმე, როგორიც 21 დეკემბრის ღამე, ისეთი სავალდებულო, როგორც ბანკეტებზე ერთმანეთისათვის კომპლიმენტის თქმა და ისეთივე მოსაწყენი, როგორიც ტელევიზიების შუაღამის ეთერი…

10660204_200280126809237_567616884328171006_n

  1. “ოცნებობენ ანდროიდები ელექტრონულ ცხვრებზე?”

საწოლის გვერდით მოთავსებულმა „განწყობის მოდულატორმა“ მსუბუქი ელექტრობული ხმა გამოსცა, რომელმაც ავტომატური ელექტრომაღვიძარა გაააქტიურა და რიკ დეკარდი სუსტი, სასიამოვნო ელექტროიმპულსით გააღვიძა…
do-androids-dream-of-electric-sheep

  1. “მხედვარი”

გოგონა გამთენიისას მივიდა მასთან.

ფრთხილად, ლანდივით უხმაუროდ შევიდა საკანში. ისე მიცურავდა, ჩქამიც არ ისმოდა, გარდა ხმისა, რომელსაც შიშველ სხეულთან შეხებისას გამოსცემდა მისი მანტია…

wiedzmin-tom-1-ostatnie-zyczenie-b-iext27106551

  1. “უცხო”

დღეს დედა მომიკვდა. ან იქნებ გუშინ, არ ვიცი. თავშესაფრიდან ფეპეშა მივიღე: „დედათქვენი გარდაიცვალა. დაკვრძალვა ხვალ. გულითადად გისამძიმრებთ.“ ეს არაფერს ნიშნავს. შეიძლება გუშინ იყო.

51Gyltc8l4L._SY344_BO1,204,203,200_

Posted in ზოგადი | %(count)s კომენტარი

ყველაზე ძვირადღირებული წიგნები

books-and-hammer

ჯ. ჯოისის – „ულისე“;   სელინჯერის – „კლდის პირზე, ჭვავის ყანაში“;  ჯ.კ. როულინგის „ჰარი პოტერი“ და სხვ. წიგნები, რომლებიც აუქციონებზე რეკორდულ ფასად გაიყიდა.

ცნობილ მწერალთა პირველი გამოცემები, ნებისმიერი წიგნის კოლექციონერის თაროს დაამშვენებდა და ამავე დროს, კარგი ინვესტიციაც გახდებოდა. ის ფაქტორები, რომლებიც განსაზღვარევენ წიგნის ფასს, არის: 1. ტირაჟი – როგორც წესი, შეზღუდული ტირაჟი; 2. ავტორის ხელმოწერა – სატიტულო გვერდზე; 3. „წიგნის ასაკი“ ;  4. ავტორის მიღწევები.

თქვენს წინაშეა, ცნობილ მწერალთა 10 ყველაზე ძვირადღირებული პირველი გამოცემა.  ეს წიგნები მე-20 საუკუნეში დაიბეჭდა და სხვადასხვა აუქციონებზე გაიყიდა მაქსიმალურ ფასად.

  1. „ულისე“- ჯეიმს ჯოისი __ $460 500

ლეგენდარული რომანის „ულისეს“ პირველი ეგზემპლარი მე-20 საუკუნეში,  ბუკინისტებისა და კოლექციონერებისთვის ლეგენდად იქცა. ეს ფაქტი კი მარტივად აიხსნება: 1922 წელს, პარიზულმა გამოცემამ „Shakespeare and Company“, ძვირადღირებულ ჰოლადიურ ქაღალდზე, რომანის 100-150 ეგზემპლარი დაბეჭდა. ამასთანავე, ცნობილია, რომ ჯოისის ხელმოწერა, პირველი გამოცემის მხოლოდ ორ წიგნზეა და 2002 წელს  „Christie’s“ აუქციონზე, ზუსტად ერთ-ერთი მათგანი გაიყიდა. ხელმოწერა ეძღვნებოდა ჰენრი კაიზერს, და თარიღდება 1922 წლის ოქტომბრით.  შესაბამისად,  არაფერია საკვირველი იმაში, რომ  წიგნის ფასმა 460 000$ მიაღწია.

d3984062x

  1. „აღმოხდების მზე“ – ერნესტ ჰემინგუეი __ $366 400

რომანი – „აღმოხდების მზე“ ერნესტ ჰემინგუეის შემოქმედებაში უმნიშვნელოვანესი ნაწარმოებია. სამწუხაროდ, ის გამომცელობისთვის, მორიგი დამწყები ავტორის ერთ – ერთი წიგნი იყო.  რომანი, 1926 წელს, შეზღუდული ტირაჟით დაბეჭდა გამომცემლობამ „Scribner“. წიგნის ეს ეგზემპლარი, 2004 წელს, ნიუ-იორკში, აუქციონზე – Sotheby, რეკორდულ თანხად  – $366 400 გაიყიდა.  ეს ყველაფერი კი მარტივად აიხსნება:  წიგნის იდეალური მდგომარეობა და სატიტულო გვერდზე ავტორის ხელმოწერა (ეძღვენობდა ექიმ დონ კარლოს გაფის), რომელსაც სიდიდის გამო, თამამად შეიძლება ეწოდოს – წერილი და არა ხელმოწერა.

7aaaa4661c14

  1. ჯეკ კერუაკი -„გზაზე“ __$185 500

ერთ – ერთი მნიშვნელოვანი „ბიტნიკის“- ჯეკ კერუაკის რომანი – „გზაზე“, „გატეხილ თაობათა“  წარმომადგენლებისათვის საკულტო ნაწარმოებად იქცა. ბოლო 30 წლის განმავლობაში, აუქციონებზე, პირველი – 1957 წლის გამოცემის (Viking Press), 4 ხელმოწერილი ეგზემპალარი „ამოტივტივდა“. ნიუ-იორკში, ოქტომბრის ცნობილ „Christie“ -ის აუქციონზე, ამ წიგნებიდან ერთ-ერთის ღირებულებამ რეკორდული თანხა – 185 500$  შეადგინა. ყდის შიდა გვერდზე წარწერა  ეძღვნება კერუაკის მეგობარს – ჯოის ჯონს.

Безымянный3

  1. სკოტ ფიცჯერალდი – „დიდი გეტსბი“ __ $167 487

„დიდი გეტსბი“ ჯაზის ეპოქის ერთ-ერთ საუკეთესო ლიტერატურული ნაწარმოებად ითვლება, და ის არა მხოლოდ ფიცჯერალდის შემოქმედების, არამედ მე-20 საუკუნის ამერიკული ლიტერატურის მწვერვალიცაა. მისი პირველი გამოცემა, რომელიც ნიუ-იორკის გამომცემლობამ – “Charles Scribner’s Sons“ – დაბეჭდა, მალევე გავრცელდა წიგნის მაღაზიებში. ჩვენს დრომდე მოღწეული პირველი გამოცემის არც თუ ისე ბევრი ეგზემპლარია იდეალურ მდგომარეობაში. თუმცა, პერიოდულად ისინი (იდეალურ მდგომარეობაში მყოფი ეგზემპლარები) სხვადასხვა აუქციონზე გამოჩნდებოდა-ხოლმე და რეკორდულ თანხადაც იყიდებოდა. მაგ: 2007 წლის ივნისში ლონდონის „Sotheby“-ს აუქციონზე ერთ-ერთი ასეთი წიგნი გაიყიდა 84 000 ფუნტ სტერლინგად. პირველი გამოცემა ცნობილია ასეთი დიზაინით:    ქალის სახე ლურჯ-მომწვანე ფონზე.

5927305-R3L8T8D-500-4

  1. „მარმარილოს ფავნი“ (“The Marble Faun”) – უილიამ ფოლკნერი – $95 600

პირველ რიგში, უილიამ ფოლკნერი ცნობილია როგორც მე-20 საუკუნის  რომანისტი და პროზაიკოსი, თუმცა ცოტამ თუ იცის, რომ მისი პირველი წიგნი ლექსების კრებული იყო. 1924 წელს ბოსტონის პატარა გამომცემლობამ „Four Seas Company“, ავტორის ხარჯებით, დაბეჭდა „მარმარილოს ფავნი“ (“The Marble Faun”)ის 500 ეგზემპლარი. განსაკუთრებული შთაბეჭდილება ამ წიგნმა ვერც მკითხველებსა და ვერც კრიტიკოსებზე  ვერ მოახდინა, „მარმარილოს ფავნი“-ზე ხალხი მხოლოდ მაშინ ალაპარაკდა, როცა ფოლკნერი ცნობილი მწერალი გახდა.  2002 წელს ნიუ-იორკში „Christie“-ის  აუქციონზე წიგნის პირველი გამოცემის ის ეგზემპლარი გაიყიდა 95 600$-ად, რომელშიც ავტორის მინაწერი  იყო მშობლებისადმი.

d3983961x

  1. 1984 – ჯორჯ ორუელი$75 428

ლეგენდარული ანტიუტოპიური წიგნი პირველად, 1949 წლის ივნისში, Harcourt, Brace and Company-ის გამომცემლობამ დაბეჭდა, ავტორი კი 1950 წლის იანვარში გარდაიცვალა. გასაკვირი არ არის, რომ „1984“-ის, ავტორის ხელმოწერილი პირველი გამოცემის წიგნები, თითზე ჩამოსათვლელი რაოდენობითღა  შემორჩა.  2012 წლის დეკემბერში ერთი-ერთი მათგანი ლონდონის  „Sotheby’“ -ის აუქციონზე გაიყიდა -46 850 £.  ორუელის ხელმოწერა ბრიტანელ მწერალს – ოსბერტ სიტველს ეძღვნებოდა.

5927505-R3L8T8D-500-6

  1. „მრისხანების მტევნები“ – ჯონ სტაინბეკი$41 825

რომანი „მრისხანების მტევნები“ დიდი დეპრესიის პერიოდის ერთ-ერთ საუკეთესო ნაწარმოებად ითვლება. ამ წიგნისთვის ჯონ სტაინბეკმა 1940 წელს პულიცერის პრემია მიიღო, და ამ რომანის მიხედვით 1941 წელს ჯონ ფორდმა გადაიღო ფილმი, რომელმაც 2 ოსკარი მოიპოვა. გამომცემლობა Viking Press-მა 1939 წელს პირველად დაბეჭდა „მრისხანები მტევნები“ და იმავე წელს, 430 000-ზე მეტი წიგნი გაიყიდა. Christie-ის აუქციონზე, ნიუ-იორკში,  წიგნის ის ეგზემპლარი გაიყიდა, რომელზეც სტაინბეკის წარწერა იყო.

07d3984168x

  1. „ჰარი პოტერი და ფილოსოფიური ქვა“ – ჯ.კ როულინგი – $40 326

1997 წლის ივლისში, ბრიტანულმა გამომცემლობამ Bloomsbury, გარისკა და დაბეჭდა უცნობი მწერლის წიგნი, რომელიც ეხებოდა პატარა ჯადოქრის თავგადასავალს. პირველი გამოცემის ტირაჟი, მხოლოდ, 500 ეგზემპლარი იყო და მათი დიდი ნაწილი სკოლის ბიბლიოთეკებში გაიგზავნა. მხოლოდ, მცირედი ნაწილი მოხვდა კერძო პირთა ხელში, და სწორედ ეს რამდენიმე წიგნი, იქცა ბევრი კოლექციონერის ოცნებად. ცნობილი წიგნის პირველი გამოშვებიდან 10 წლის შემდეგ, ლონდონში  Christie-ის აუქციონზე, სწორედ ეს იშვიათი ეგზემპარი გაიყიდა – £19 700.

UNDATED:  This handout from Christie's shows the cover of J K Rowling's first novel Harry Potter And The Philosopher's Stone. Fine printed books and manuscripts, including a rare first edition of J K Rowling's first novel Harry Potter And The Philosopher's Stone, is estimated to auction off at12,000 pounds at Christie's May 3, 2003 in London. Rowling's latest addition to the series, Harry Potter & The Order of The Phoenix, is expected to be released in bookstores June 21.  (Photo by Christie's/Getty Images)

  1. „კლდის პირზე, ჭვავის ყანაში“ – ჯერომ სელინჯერი – $32 900

სელინჯერს არ მოეწონა  კომპანია Little, Brown and Company- ის მიერ შექმნილი, „კლდის პირზე, ჭვავის ყანაში“,  პირველი გამოცემის,  დიზაინი. მან მოითხოვა, ბოლო გვერდიდან თავისი პორტრეტის მოშორება, თუმცა უშედეგოდ: ავტორის თავდაპირველი მოთხოვნა, მხოლოდ, წიგნის რეპრინტის დროს იქნა გათვალისწინებული. პირველი გამოცემის წიგნები, მალევე დაიტაცეს წიგნის მაღაზიებიდან და სელინჯერის სიცოცხლეშივე, ისინი ბუკინისტებთანაც კი იშვიათად იყიდებოდა. „კლდის პირზე, ჭვავის ყანაში“-ის, ყველაზე ძვირადღირებული ეგზემპლარი გახდა ის, რომელიც 2001 წელს, Christie-ის აუქციონზე გაიყიდა – $32 900. წარმოგიდგენიათ, რა ეღირებოდა ავტორის ხელმოწერილი წიგნი?…

09d5216974l

  1. „451 გრადუსი ფარენჰეიტით“ – რეი ბრედბერი __ $6110

რეი ბრედბერი, სიცოცხლეშვე, სამეცნიერო ფანტასტიკის კლასიკოსად იქცა. მის მიერ არჩეული „არასერიოზული“ ჟანრის გამო, მას არასოდეს აყენებდნენ ჯოისისა და ჰემინგუეის გვერდით, მაგრამ იმ ფაქტის უარყოფა, რომ მისმა შემოქმედებამ მკითხველთა რამდენიმე თაობის აზროვნებაზე დიდი გავლენა მოახდინა, სისულელე იქნებოდა. მათ შორის განსაკუთრებით აღსანიშნავია რომანი – „451 გრადუსი ფარენჰეიტით“.  წიგნი პირველად 1953 წელს დაბეჭდა გამომცემლობამ  – Ballantine Books, და მაშინვე ბესტსელერი გახდა.  რომანის პირველი გამოცემა განსაკუთრებულ იშვიათობას არ წარმოადგენს და მისი ღირებულება რამდენიმე ასეულ დოლარს შეადგენს.  თუმცაღა, ხელმოწერილი ეგზემპლარები, რომელთა რაოდენობა დაახლოებით ორასი ცალია, რამდენიმე ათას დოლარადაა შეფასებული  და ერთ-ერთი მათგანი, 2010 წლის ივლისში, ლონდონის Sotheby-ის აუქციონზე გაიყიდა – £4000.

5927905-R3L8T8D-500-10

Posted in ზოგადი | დატოვე კომენტარი